الاثنين، 31 أغسطس، 2009

رمضان بطعم جديد

رمضان السنه دى جاى بطعم جديد وظروف تختلف عن رمضانات اللى فاتت........ليه؟
أقولك عشان رمضان السنه دى جاى فى نهاية الاجازة يعنى عندنا تلاتين يوم فى الاجازة نتقرب فيهم لربنا ونكفر عن كل الذنوب الى عملناها فى الاجازة بسبب الفراغ يعنى فرصة ممتازة لبرنامج متميز فى رمضان نقدر فيه
أ-بالنسبه للولاد "التواجد مبكرا فى صلاة الفجر فى المسجد" والصلاة على وقتها بالنسبه للبنانيت
ب-عمل حجه وعمرة كل يوم
ج-مضاعفة الوقت المخصص لتلاوة القران وتدبر معانيه
د-صلاة التراويح بطعم جديد من غير مذاكره
ايه رأيكوا نخلى رمضان ده سبب تغيرنا تعالوا نجرب مع نفسنا لاول مرة نكتب على ورقة بيضاء ثلاث حاجات ترضى ربنا عمرنا ما عملناهم ونحاول نعملهم فى رمضان ده جرب احساسك بالطاعة وهتشوف الفرق وهدية منى طريقة جديدة لختم القران فى رمضان خصص خمس دقايق بعد كل صلاة واقرا اربع صفحات وفى اخر رمضان هتفاجأ انك ختمت قراءة القران وكل ما تضاعف الوقت تختم اكتر وطبعا لان رمضان موسم الطاعة والثواب ايه رايكم كل واحد يجيب اتنين كيلو بلح وشوية كياس من عند ماما ويخلى حد من صحابه يساعده فى تفصيص البلح ووضع كل ثلاث تمرات فى كيس ويوزعها على السيارات قبل المدفع بعشر دقايق وناخد ثواب افطار مائة صائم فرصة يا شباب فى رمضان ده نجرب حاجات جديدة يلا نقول علشانك يا رب هغير حياتى علشانك يارب هبطل السجاير علشانك يارب هبعد عن صحبة السوء علشانك يارب هقول لحاجات كتير غلط بعملها لأ علشانك يارب مش هخلى موبايلى فاطر ومهستخدموش الا فى طاعة يعنى اغانى لأ معاكسة ممنوع خليك مع رمضان جرب مرة ترن على صاحبك تصحيه يتسحر وتفضل تغلس عليه بالرنات علشان مينمش ويصلى الفجر جرب مرة تواسى مريض تبعت كلمة حلوة حديث ابعت حتى ايه المهم خليك مع رمضان وبكده يكون موبايلك له طعم تانى فى رمضان احلى حتى من طعم الكنافة والقطايف مش مسدق خلاص جرب بنفسك رمضان بجد موسم الكل فيه مقبل على الله يعنى هتلاقى ناس كتير تحفزك على عمل الخير وكسب الحسنات رمضان اوله رحمة واوسطه مغفره واخره عتق من النار قال_صلى الله عليه وسلم_"من صلى أربعين يوما فى جماعة يدرك التكبيرة الأولى كتبت له براءتان براءة من النار وبراءة من النفاق"ده مش كلام اى حد ده كلام رسولنا وحبيبنا محمد كلام الصادق الامين"وماينطق عن الهوى"يعنى اللى عايز ياخد براءة من النار يصلى أربعين يوم فى جماعة فتعالوا نستغل رمضان ايوه نستغل رمضان تلاتين يوم هى عمر الشهر الكريم تعالوا منضيعش فيها تكبيرة صلاة الفجر أبدا وكده كده احنا بنصحى للسحور ومن صبر على الثلاثين يوم فسيقدر باذن الله على العشرة أيام الباقية وشيلوا بقى من القاموس "لا الموضوع ده صعب "انا مقدرش"لا تقدروا "لا يكلف الله نفسا الاوسعها"يعنى نقدر ايوه نقدر ورمضان فرصة انت ونفسك بس فى الميدان الشياطين صفدت والارض بتنعم بأنوار الطاعة تعالوا نصلى ثمانى ركعات"صلاة التراويح"بطعم جديد بطعم الخشوع والتذلل بين يدى الله تعالوا نبكى بجد خوفا من عذاب النار ولو عمرك ما صليت التراويح رمضان السنه دى فرصة تبدأ فيه روح مسجد كبير وأتفرج على الناس وهيا متذللة بين ايدى الله وشوف سعادتها بعد الصلاة وأسال نفسك ليه حرمتها من السعادة دى سدقنى تانى يوم هتلاقى نفسك معاهم بتصلى ومتذلل لله مش مسدق جرب